Вечерва во Струмица ќе се одржи традиционалниот свечен чин на предавање на клучот на карневалџиите од страна на градоначалникот Петар Јанков, со што симболично ќе биде означен почетокот на највеселата манифестација во градот.
Настанот ќе се одржи на Градски плоштад „Гоце Делчев“, во среда (18 февруари), со почеток во 18:00 часот. Со предавањето на клучот, карневалџиите традиционално ја преземаат „власта“ во градот и започнува официјалната програма на Струмички карневал.
Карневалските свечености ќе траат од 18 до 25 февруари 2026 година, а завршниот ден ќе донесе кулминација со паради, маскирани дефилеа и музички перформанси. Улиците на Струмица ќе бидат исполнети со живописни костими, локална музика и препознатлива карневалска енергија што ја негува традицијата и создава незаборавна атмосфера за сите посетители.