Европската Унија им одбила влез на повеќе од 27.000 патници на своите надворешни граници од воведувањето на новиот Систем за влез/излез (EES), кој од неодамна е целосно оперативен, соопшти Европската комисија. Од неговото лансирање во октомври минатата година досега се регистрирани над 52 милиони гранични премини.
EES претставува дигитален систем кој ги заменува печатите во пасошите со електронски записи, овозможувајќи автоматско следење на влезот и излезот на патниците. Според податоците, околу 700 лица од одбиените биле идентификувани како потенцијална безбедносна закана.
Системот се применува на надворешните граници на 29 земји, вклучително и членките на Шенген зоната. За краткорочен престој, патниците кои не се државјани на ЕУ се должни да скенираат пасош, да дадат отпечатоци од прсти и фотографија, кои се дигитално складирани.
Магнус Брунер изјави дека системот овозможува целосна контрола врз движењето на патниците, додека Хена Виркунен посочи дека EES овозможува навремено препознавање на ризици и подобро справување со прекршувањата на дозволениот престој.
И покрај почетните стравувања од задржувања, просечното време за обработка изнесува околу 70 секунди по патник. Воведувањето на EES е дел од пошироката стратегија за дигитализација на европските граници и зајакнување на безбедноста и контролата на миграциските текови.
Извор: Фактор.мк.