Ново научно истражување покажува дека лековите од групата GLP-1, познати по нивната улога во регулирање на шеќерот во крвта и намалување на телесната тежина, би можеле да имаат клучна улога и во опоравувањето по срцев удар. Овие сознанија отвораат нови можности за подобрување на преживувањето и намалување на компликациите кај пациентите.
Студијата објавена во списанието Nature Communications покажува дека GLP-1 лековите можат да го подобрат протокот на крв во срцето по инфаркт. Тие делуваат така што ги опуштаат малите крвни садови (капилари), кои често остануваат затворени по срцев удар – појава позната како „no-reflow“.
Истражувачите откриле дека овие лекови влијаат на клетки наречени перицити, кои можат да ги стегаат капиларите и да го блокираат протокот на крв. Со активирање на одредени канали во клетките, GLP-1 овозможува нивно опуштање, што доведува до повторно отворање на крвните садови и подобра циркулација.
Ова е особено важно бидејќи блокадата на малите крвни садови е поврзана со поголем ризик од срцева слабост и смртен исход. Дури и мало подобрување во протокот на крв може значително да влијае врз закрепнувањето на пациентите.
Иако резултатите се добиени од истражувања на животински модели, експертите ги оценуваат како многу ветувачки. Следниот чекор се клинички испитувања кај луѓе, кои ќе покажат дали овие ефекти можат да се применат во реалната медицинска пракса.
Доколку се потврдат, GLP-1 лековите би можеле да станат важен дел од третманот по срцев удар, со потенцијал да спасат многу животи.
Извор: Дневник.хр.