Премиерот Андреј Пленковиќ ќе одржи владина седница во Загреб, на која ќе биде усвоен нов, десетти по ред пакет мерки за заштита на граѓаните и економијата.
Мерките имаат за цел да го ублажат растот на цените на струјата, гасот и горивата, кој е последица на глобалните случувања и кризата на Блискиот Исток. Министерот за економија Анте Шушњар најави дека Владата ќе интервенира со откажување од дел од акцизите со цел да се намали ценовниот притисок.
Дополнително, ќе продолжат мерките за електрична енергија и гас, што значи дека цените за домаќинствата ќе останат непроменети. Владата планира и делумно регулирање на маржите на енергетските компании, како и мерки за спречување т.н. „бензински туризам“.
Предвидена е и поддршка за малите дистрибутери преку олеснувања како мораториум на кредити, додека за земјоделците и рибарите ќе се обезбедат дополнителни механизми за одржување на достапни цени на горивата.
Од Владата апелираат граѓаните да не создаваат непотребни резерви на гориво, нагласувајќи дека државата има капацитет долгорочно да се справи со ценовните шокови и да обезбеди стабилност на пазарот.