Ишијас и покачена температура: 7 можни причини што не треба да се игнорираат
Комбинацијата од ишијас и температура може да биде поврзана со повеќе различни состојби. Една од нив е спондилодисцитис, бактериска инфекција на интервертебралниот диск и соседните пршлени, која предизвикува воспаление, силна болка во долниот дел од грбот и симптоми како треска, слабост и болка што се шири по ногата.
Друга сериозна причина може да биде спинален епидурален апсцес, при што се создава гној во просторот околу ‘рбетниот мозок. Оваа состојба предизвикува силна болка, температура, треска и понекогаш невролошки симптоми како слабост или вкочанетост во нозете.
Бубрежните камења исто така можат да предизвикаат силна болка во долниот дел од грбот која се шири кон препоните или ногата. Ако се појави и инфекција на уринарниот систем, може да се јават температура, треска и проблеми при мокрење.
Честа причина за ишијас е и дискус хернија, кога дел од дискот притиска врз нервниот корен. Иако температурата не е типичен симптом, во некои случаи може да се појави блага покачена температура поради воспалителна реакција.
Поретки, но сериозни причини се тумор на ‘рбетот, кој предизвикува постојана болка што се влошува со тек на време, како и анкилозантен спондилитис, хронична воспалителна ревматска болест која предизвикува болка, утринска вкочанетост и понекогаш температура.
Во одредени случаи, симптомите може да се појават и при респираторни инфекции како грип, КОВИД-19 или пневмонија, кога воспалението во организмот предизвикува болки во мускулите и грбот.
Лекарска помош треба да се побара ако болката во грбот или ногата е придружена со температура повисока од 38°C, ако болката се влошува, или ако се појават симптоми како слабост во нозете, вкочанетост, проблеми со мокрењето или општо влошување на состојбата.
Извор: Дневник.хр