Долготрајната изложеност на загаден воздух, особено на ситните честички ПМ2.5, значително го зголемува ризикот од развој на Алцхајмерова болест, покажува нова студија на американскиот Емори универзитет, објавена во списанието PLOS Medicine, пренесува Euronews.
Истражувањето, кое опфатило повеќе од 27 милиони лица над 65 години, укажува дека загадувањето директно влијае врз мозокот, а не само индиректно преку болести како хипертензија, мозочен удар или депресија. Најсилна поврзаност е забележана кај лица кои претходно претрпеле мозочен удар.
Ситните честички ПМ2.5 потекнуваат од издувни гасови, индустрија, термоцентрали и согорување на фосилни горива и се особено опасни бидејќи навлегуваат длабоко во белите дробови и крвотокот.
Според Светска здравствена организација, повеќе од 55 милиони луѓе во светот живеат со деменција, а Алцхајмеровата болест сочинува до 70% од случаите. Организацијата постави глобални цели за намалување на загадувањето и за преполовување на смртноста поврзана со загаден воздух до 2040 година во споредба со 2015 година.