Бугарија треба да ја заврши изградбата на својата прва станица за набљудување за најголемиот нискофреквентен радиотелескоп во светот до крајот на 2026 година, објави Институтот за астрономија при Националната астрономска опсерваторија на Бугарската академија на науките (NAO-BAS).
Како што пишува Бугарската новинска агенција, (БТА), оваа станица ќе стане дел од мрежата LOFAR (Low Frequency Array), што го означува влезот на Бугарија во најсовремената европска радиоастрономија.
LOFAR е паневропски проект и најголемиот телескоп од ваков вид во светот. Моментално управува со 52 антенски станици во осум земји, вклучувајќи ги Холандија, Германија, Полска, Франција, Ирска, Латвија, Шведска и Обединетото Кралство. Плановите за проширување вклучуваат дополнителни станици во Италија и Бугарија, со што Југоисточна Европа ќе биде вклучена во мрежата. Телескопот овозможува истражување во повеќе научни области, од сончева физика и вселенско време до формирање на галаксии, студии на пулсари, минливи радио феномени и мапирање на космички магнетни полиња.
Бугарија се приклучи како ко-основач на Конзорциумот за европска истражувачка инфраструктура LOFAR ERIC во декември 2023 година, заедно со Германија, Ирска, Италија, Холандија и Полска.