Кога ќе се разболиме, природно е да сакаме што побрзо да се вратиме во форма. Но, некои навики кои ни изгледаат безопасни, всушност можат да ги влошат симптомите и да го забават закрепнувањето. Доколку имате настинка или грип, избегнувајте ги следните чести грешки за да му дадете на телото најдобра шанса да оздрави.
1. Се форсирате наместо да одмарате
Обидот да го „истуркате“ денот како и обично не е добра идеја. На телото му е потребна енергија за да се избори со вирусот.
Одморот нека ви биде приоритет – откажете ги обврските и останете дома. Така не само што си помагате во закрепнувањето, туку и го спречувате ширењето на заразата.
2. Ги игнорирате симптомите на грип
Кај обична настинка најчесто не е потребна посета на лекар. Но, доколку имате висока температура, болки во телото и изразен замор, можно е да станува збор за грип.
Во таков случај, јавете се кај лекар, бидејќи антивирусните лекови, ако се земат во првите 48 часа, можат да го скратат траењето на болеста и да ги ублажат симптомите.
3. Премалку спиете
Недостатокот од сон го ослабува имунитетот и ја отежнува борбата против инфекцијата. Докажано е дека лицата кои спијат помалку од шест часа имаат значително поголем ризик да се разболат.
Обидете се да легнувате порано, а доколку можете, одморете и преку ден. Ако кашлицата ве мачи ноќе, малку мед и овлажнувач на воздух може да помогнат.
4. Барате антибиотици без потреба
Антибиотиците не делуваат на вируси, а настинката и грипот се вирусни заболувања. Нивната непотребна употреба може да доведе до несакани ефекти, како дијареа и алергиски реакции, и придонесува за отпорност на антибиотиците – сериозен глобален здравствен проблем.
5. Не внесувате доволно течности
Кога ве боли грлото, лесно е да се заборави на водата. Но, добрата хидратација помага во разредување на слузта, го намалува затнувањето на носот и ја ублажува главоболката.
Освен вода, консумирајте и топли напитоци, како билен чај или супа – тие можат да го олеснат заморот и болката во грлото.
6. Ги прескокнувате оброците
Намалениот апетит е чест кога сте болни, но на телото и понатаму му се потребни енергија и хранливи материи. Тие ги хранат имунолошките клетки кои се борат против вирусот.
Лесни оброци, како пилешка супа, можат да бидат од голема помош.
7. Пушите или сте изложени на чад
Пушењето дополнително ги иритира дишните патишта и ги оштетува белите дробови, што може да ги влоши кашлицата и болката во грлото. Доколку сте болни, избегнувајте цигари, електронски цигари и пасивно пушење.
8. Постојано сте под стрес
Стресот го поттикнува лачењето на хормони кои го ослабуваат имунитетот и ја зголемуваат воспалителната реакција во телото, што може да ја влоши затнатоста на носот и општата состојба.
Обидете се да се опуштите и да се фокусирате на закрепнувањето – телото ќе ви биде благодарно, пренесува Здравје/Дневник.хр.