Изразот „синдром на празнично срце“ (Holiday Heart Syndrome) се користи за да се опише појавата на срцеви аритмии по период на прекумерна консумација на алкохол, што најчесто се забележува за време на викенди и празници.
Сѐ е прифатливо додека умерено уживаме во празничната атмосфера – чаша вино со ручек или едно пиво со пријателите. Но, проблемот настанува кога се претерува. Прекумерното пиење алкохол претставува сериозна опасност не само за физичкото, туку и за менталното здравје, како за лицето што пие, така и за околината.
Синдромот на празнично срце е поврзан со т.н. „binge drinking“, односно консумирање пет или повеќе алкохолни пијалаци во краток временски период. Оваа состојба првпат била опишана во 1970-тите години, кога било забележано дека кај дел од пациентите по интензивно пиење се јавува атријална фибрилација – неправилен и забрзан срцев ритам.
Истражувањата покажуваат дека синдромот може да се појави и кај лица кои вообичаено ретко или воопшто не пијат алкохол, но повремено претеруваат. Дополнително, долготрајната и секојдневна злоупотреба на алкохол може да доведе до сериозно оштетување на срцевиот мускул (дилатативна кардиомиопатија), состојба која во најтешките случаи бара трансплантација на срце.
При прекумерно пиење, во организмот доаѓа до нарушување на рамнотежата на електролитите и влијание врз автономниот нервен систем, што може да предизвика срцеви аритмии. Најчести симптоми се ненадејно силно чукање или „прескокнување“ на срцето, отежнато дишење, вртоглавица и болка во градите.
Доколку ваквите симптоми се појават по консумирање поголеми количини алкохол, неопходно е веднаш да се побара медицинска помош. Во итната служба се прават ЕКГ, крвни анализи и следење на срцевиот ритам, а терапијата зависи од тежината на состојбата.
Пораката е јасна: умереноста е најдобрата заштита. Една до две чаши вино или едно пиво се доволни за добро расположение. Претерувањето може да ги уништи празниците – и за вас, и за вашите најблиски. Како добра новогодишна одлука, лекарите препорачуваат одговорна и умерена консумација на алкохол.