Турските безбедносни сили приведоа 115 осомничени членови на Исламска држава, осомничени за планирање напади за време на прославите на Божиќ и Нова Година во земјата, соопшти во понеделник Канцеларијата на главниот обвинител во Истанбул.
Истанбулската полиција добила информации дека членови на Исламска држава планирале напади во Турција, особено против немуслимани за време на прославите на Божиќ и Нова Година, соопшти обвинителството на платформата X, пренесува Ројтерс.
Во соопштението се вели дека полицијата извршила рации на 124 локации во Истанбул и уапсила 115 лица, од 137 осомничени по кои се трага.
За време на апсењата на осомничените се запленети неколку оружја и муниција.
Турската разузнавачка агенција МИТ го уапси Мехмет Горен, член на Исламска држава Хорасан (ИС-К), во вторник, спречувајќи планирани напади за новогодишната ноќ, а операцијата ја разоткри и мрежата за регрутирање на терористичката организација.
Горен, познат под кодното име Јахја, беше уапсен во граничниот регион меѓу Авганистан и Пакистан и донесен во Турција.
Според разузнавачките информации, тој се согласил да изврши самоубиствени напади и се искачил на раководна позиција во ИС-К по обуката во кампови долж границата.
Турските власти, исто така, издадоа наредби за притвор за 10 осомничени за финансирање на мрежата на ИС во Анкара.
Жандармеријата во Анкара предупреди на 19 декември дека ИС планира напади во прометни области, вклучувајќи трговски центри и пазари, за време на новогодишните прослави.