Во Кривичниот суд продолжува судењето за пожарот во дискотеката „Пулс“ во Кочани, каде на 16 март загинаа 63 лица, а над 210 беа повредени. Денеска одбраната на поранешните директори на Дирекцијата за заштита и спасување – Шабан Салиу, Аднан Џафероски, Беким Максути и Џеват Селами, како и инспекторот Љупчо Грнчиштанов, ќе ги даде воведните зборови. Тие се обвинети дека од 2012 година не спровеле инспекциски надзор во „Пулс“ и не распоредиле инспектор во Кочани.
По нив ќе се обрати и одбраната на поранешните министри за економија Ваљон Сараќини и Крешник Бектеши, обвинети дека издале лиценца за работа на дискотеката без целосна документација. Обвинети се и петмина службеници од Министерството, при што Џеваир Камбери се товари и за примање поткуп.
Поради големиот број обвинети (35 лица), воведните излагања најверојатно ќе продолжат и утре, кога треба да се слушне одбраната на пазарните инспектори, поранешната државна секретарка Размена Чекиќ Дуровиќ и сопственикот на обезбедувањето „Рубикон“.
На претходните рочишта одбраната тврдеше дека пожарот бил резултат на пиротехника, а не на градежни пропусти, како и дека дел од обвинетите немале никакви надлежности над дискотеката. Сите обвинети претходно се изјаснија дека не се чувствуваат виновни.