Романската полиција трага по млад пар, на возраст од 18 и 21 година, осомничен дека го продал своето тринеделно бебе за 7.000 евра, а потоа со парите купил автомобил.
Судот во округот Горж издал налог за апсење и на 47-годишен маж, кој, според Обвинителството за борба против организиран криминал и тероризам (DIICOT), го купил бебето и се претставил како негов татко.
Според истрагата, во август 2025 година осомничениот маж ги убедил младите родители да му го предадат новороденчето. Потоа, во матичната служба дал лажна изјава дека е татко на детето, која била внесена и во изводот од матичната книга на родените.
Со помош на нотар од округот Клуж, добил две фалсификувани полномошни и поднел барање за пасош за бебето, со намера да го изнесе од земјата. Врз основа на тие документи, пасошката служба во Горж му издала пасош на името на детето.
За време на претресот на неговиот дом, полицијата го пронашла бебето и веднаш го пренела на безбедно место. Осомничениот 47-годишен маж е уапсен, а родителите се во бегство и по нив интензивно се трага, пренесува пресс24.мк.