Оваа недела Штип ќе биде во знакот на музиката, пријателството и сеќавањето. Два настана ќе ја исполнат градската сцена со емоции и звук – Jam Session во чест на Александар Коларов и меморијален концерт посветен на Филип Стевановски.
Музичарите од целата земја ќе се соберат за да им оддадат почит на своите колеги и пријатели, преку она што најдобро го знаат – музика од срце.
Јam Session за Александар Коларов ќе обедини млади и искусни музичари во спонтан настап исполнет со импровизации и позитивна енергија. Настанот ќе биде можност да се прослави музичкото наследство на Коларов и неговата инспирација која продолжува да живее преку новите генерации уметници.
Меморијалниот концерт за Филип Стевановски ќе се одржи на 18 октомври во 20 часот во Народниот театар во Штип, на денот на неговиот роденден. Настанот е во организација на „Макбрас асоцијација“ и Скопскиот брас фестивал, и ќе го обедини квартетот „Макбрас“, ансамбл од 12 тромбонисти, меѓу кои Кирил Рибарски, Ташко Тодоров, како и бројни млади музичари од земјава.
Во првиот дел ќе се изведуваат познати џез композиции, а вториот е посветен на пет авторски дела на Филип Стевановски, специјално аранжирани за овој концерт од Владимир Ботев.
Двата настани имаат хуманитарен и обединувачки карактер – преку музиката се чува споменот на младите таленти и се потсетува на нивниот придонес во македонската културна сцена.
Влезот е слободен, а средствата од донациите ќе бидат наменети за семејствата на настраданите во пожарот во Кочани.