Пристигнаа 2000 бесплатни дози и 100 комерцијални вакцини против сезонски грип во штипскиот ЦЈЗ, информираат надлежните за ТВ Стар. Радовиш доби 500, а Пробиштип 100 дози. Официјалниот почеток на вакцинирањето со бесплатни вакцини се очекува да започне од среда
“Ги известуваме граѓаните кои аплицирале за бесплатна доза на вакцина против сезонски грип, да се придржуваат на дадените термини за вакцинирање за како беспотребно не би се создале гужви пред вакциналниот пункт, лоциран на приземјето од Здравствениот дом во Штип”информираат од ЦЈЗ Штип.
Работното време на вакциналниот пункт во Штип ќе биде секој работен ден од 08 до 14 часот. Инаку, со бесплатната вакцинација се опфатени ризичните категории население: повозрасни лица над 65 години, лица со хронични заболувања, здравствени работници, бремени жени, деца на возраст од 6 месеци до 5 години, како и лицата сместени во установи за социјална заштита на стари лица и вработените во овие установи.
“Во тек е дистрибуција на вакцините против сезонски грип низ јавните здравствени установи, по што во текот на неделава граѓаните што се пријавиле за бесплатна вакцинација ќе бидат известени со СМС порака за терминот за вакцинација”информираат од Министерството за здравство.
Вакцинацијата против сезонски грип на ниво на држава ќе се спроведува на 35 вакцинални пункта, од кои пет во Скопје. Годинава, комерцијалната доза на вакцина против сезонскиот грип ќе чини 700 денари.