Автомобилскиот магнат Волфганг Порше има намера да ископа приватен тунел под ридот Капуцинерберг за директно да го поврзе центарот на градот Салцбург со неговата вила. Жителите на градот познат по Моцарт и богата историја, предизвикаа вистински бунт и реакции. Проектот предизвика петиција и обвинувања за фаворизирање на супербогатите, пишува „Кориере“.
Вилата позната како „Paschinger Schlössl“ на ридот Капуцинерберг станала сопственост на австрискиот писател Стефан Цвајг во 1917 година. Тој ја сакал затоа што била „романтична, недостапна“ и, најважно, „недостапна за автомобили“. Во тоа засолниште, до кое се стигнувало со искачување на повеќе од сто скали, тој ги напишал своите најпознати дела. Сепак, во 1934 година, под притисок на антисемитизмот, бил принуден да ја продаде куќата и да оди во егзил.
Еден век подоцна, новиот сопственик има сосема поинакви идеи. Волфганг Порше (82), шеф на автомобилската династија и сопственик на брендовите „Фолксваген“ и „Порше“, ја купил вилата во 2019 година за 9 милиони евра. Тој веднаш започнал радикално реновирање за да можат тој и неговата сопруга, принцезата Габриеле цу Лајнинген, да уживаат во својот нов дом. Како дел од реновирањето, изградена е подземна гаража за осум автомобили, што не е изненадувачки со оглед на тоа што магнатот е познат по својата страст за брзо возење по планински патишта.
Превземено: Репортер