Администрацијата на претседателот Доналд Трамп побара од американските универзитети да се обврзат на услови за добивање федерални средства, објави „Волстрит џурнал“, повикувајќи се на нов меморандум од 10 точки.
Според документот, универзитетите треба да:
– го ограничат запишувањето на странски студенти на додипломски студии на максимум 15% од вкупниот број,
– замрзнат школарината за пет години,
– ја ограничат инфлацијата на оценките, и
– забранат афирмативна акција врз основа на раса или пол при запишување или вработување.
Трамп го оправдува овој потег со тврдењето дека универзитетите промовираат „антиамерикански вредности“, додека застапниците за човекови права предупредуваат дека тоа може да ја загрози академската слобода и слободата на говорот.
Меморандумот, според „Волстрит џурнал“, досега е испратен до девет универзитети, меѓу кои Вандербилт, Дартмут, Пенсилванија, Јужна Калифорнија, МИТ, Тексас, Аризона, Вирџинија и Браун. Универзитетите што ќе го потпишат добиваат „значајна федерална поддршка“ и други бенефиции.
Високата советничка на Белата куќа, Меј Мејлман, изјави дека администрацијата очекува универзитетите да ја сметаат понудата за „разумна“.