Новите царини на претседателот Доналд Трамп за увоз на фармацевтски производи нема да важат за земјите со кои се склучени договори со САД кои содржат одредби за лекови, според официјален претставник на Белата куќа, со што се обезбедува ветеното олеснување за економиите, вклучувајќи ја Европската Унија и Јапонија.
Давачките за фармацевтски производи од ЕУ ќе бидат ограничени на 15 проценти според условите на рамковниот договор, изјави официјален претставник во петокот. Јапонските лекови исто така ќе бидат наплатени со стапката наведена во договорот, додаде официјален претставник. Во заедничката изјава на САД и Јапонија се вели дека американските царински стапки за јапонски лекови и полупроводници не треба да ги надминуваат оние што се применуваат за други, вклучително и за ЕУ.
Велика Британија, којашто извезува фармацевтски производи во САД, ќе се соочи со царина од 100 проценти, според официјален претставник на Белата куќа. Лондон, исто така, преговараше за трговски договор со Вашингтон кој вклучуваше одредби за слични исклучоци, но двете земји сè уште не се согласиле за стапката за фармацевтски производи.
Трамп во четвртокот изјави дека САД ќе воведат царина од 100 проценти „на кој било брендиран или патентиран фармацевтски производ, освен ако компанијата не гради свој фармацевтски производствен погон во Америка“, дефиниран како „почнување на изградба и/или во изградба“. Никаква царина нема да се применува „доколку изградбата е започната“, објави претседателот на социјалните медиуми.
Ненадејното соопштение не содржеше други детали, оставајќи некои странски престолнини да се прашуваат дали нивните договори со Вашингтон сè уште важат за новите фармацевтски тарифи. Доколку некоја компанија објави дека ќе изгради фабрика во САД, тогаш нејзините производи ќе бидат ослободени додека Министерството за трговија ја проверува најавата и спроведува процес на одобрување, рече функционерот.
Администрацијата на Трамп неодамна презеде други чекори за спроведување на трговското разбирање на ЕУ. Порано оваа недела, САД ги намалија царините за автомобили на 15 проценти, од 25 проценти.
Превземено: БлумбергАдрија