Напаѓачот на ПСЖ и француски репрезентативец, Осман Дембеле, е добитник на Златната топка за 2025 година. Тој ја освои наградата по историската сезона во која со парижаните го подигна првиот трофеј во Лигата на шампиони, совладувајќи го Интер во финалето со 5-0.
На церемонијата во Париз, наградата му ја врачи легендарниот Роналдињо. Зад Дембеле во изборот заврши 18-годишниот талент на Барселона, Ламин Јамал, а трет беше неговиот соиграч од ПСЖ, Португалецот Витиња.
Други награди
Најдобра фудбалерка: Аитана Бонмати (Шпанија)
Најдобар тренер (машка конкуренција): Луис Енрике (ПСЖ)
Најдобар тренер (женска конкуренција): Сарина Вигман (Англија)
Најдобар клуб: ПСЖ (машки), Арсенал (женски)
Награда „Лав Јашин“ за голман: Џанлуиџи Донарума (Манчестер Сити, поранешен ПСЖ)
Награда „Герд Милер“ за најдобар стрелец: Виктор Ѓокереш (Арсенал)
Најдобар млад фудбалер U21: Ламин Јамал (Барселона, по втор пат)
Најдобра млада фудбалерка: Вики Лопез (Барселона)
По добивањето на наградата, Дембеле не ги криеше емоциите:
„Неверојатно е ова што ми се случи. Да ја освојам Златната топка и тоа од рацете на Роналдињо е нереално. Благодарност до мојот тим, клубот, тренерот Луис Енрике кој ми е како татко, како и до моето семејство и најблиските кои беа со мене во сите тешки моменти.“
Французинот се потсети и на својот пат до врвот: од Рен и Борусија Дортмунд, преку Барселона каде што играше со Меси и Иниеста, до моментот кога во ПСЖ конечно ги оствари сите соништа.
Со ова признание, Дембеле ја круниса најуспешната сезона во својата кариера, оставајќи силна порака дека истрајноста и вербата носат резултати.