Франција и неколку други земји денес се очекува да ја признаат државата Палестина, обидувајќи се да извршат поголем притисок врз Израел на отворањето на годишниот самит на ОН во Њујорк, на кој ќе доминира војната во Газа.
Признавањето, во голема мера симболично, закажано за самитот организиран од Франција и Саудиска Арабија за иднината на решението за две држави, во кое Израелците и Палестинците живеат еден до друг во мир и безбедност, е кулминација на месеци процес за кој Емануел Макрон се бореше напорно.
Процесот доведе до усвојување на текст со големо мнозинство во Генералното собрание на ОН со кој се поддржува идната палестинска држава, недвосмислено исклучувајќи го исламистичкото движење Хамас. Ова е услов што го бараат многу западни земји.
Израел и САД ќе го бојкотираат самитот, изјави израелскиот амбасадор во ОН, Дени Данон, опишувајќи го настанот како „циркус“. „Не мислиме дека е корисен. Мислиме дека всушност го наградува тероризмот“, им рече тој на новинарите во четвртокот.
Израел размислува за анексирање на дел од окупираниот Западен Брег како можен одговор, како и за специфични билатерални мерки против Париз, изјавија израелски претставници.
Американската администрација, исто така, предупреди на можни последици за оние што преземаат мерки против Израел, вклучително и против Франција, чиј претседател Емануел Макрон е домаќин на самитот во Њујорк.
Превземено: Макфакс