Таа ќе достави документација во рамките на тужба за клевета против инфлуенсерката Кандис Овенс.
Францускиот претседател Емануел Макрон и неговата сопруга Брижит планираат да приложат научни докази пред суд во САД за да ги отфрлат тврдењата дека г-ѓа Макрон е родена како маж, објави dariknews.bg.
Адвокатот на семејството, Том Клер, изјави за BBC дека двајцата ќе ја достават документацијата во рамките на тужба за клевета против крајно десничарската инфлуенсерка Кандис Овенс, која повеќепати ја ширела својата убеденост дека Брижит Макрон е трансродова.
Одбраната на Овенс веќе побарала отфрлање на тужбата.
Клер нагласи дека клеветите биле „исклучително трауматични“ за првата дама и претставуваат „непотребен шум“ во животот на претседателот. „Секој што се обидува да ја усогласи кариерата со семејниот живот знае што значи кога семејството ти е нападнато. Тоа тежи, дури и ако си шеф на држава,“ коментира тој.
Според него, ќе бидат приложени и експертски сведочења со научен карактер. Иако не откри детали, адвокатот увери дека двојката е подготвена „и општо и конкретно“ да ја докаже целосната неоснованост на обвиненијата.
„Многу е непријатно човек да биде принуден да приложува вакви докази јавно, но таа е решена да помине низ тоа за да го исчисти своето име,“ додаде Клер.
На прашањето дали семејството планира да приложи и фотографии од Брижит за време на бременост и во улога на мајка, адвокатот потврди дека такви постојат и ќе бидат приложени на суд „во согласност со правилата и стандардите.“
Кандис Овенс, поранешна коментаторка на конзервативниот медиум Daily Wire и инфлуенсерка со милиони следбеници, повеќепати истакнала дека е убедена во своето тврдење. Во март 2024 година дури објави дека ја вложува „целата своја професионална репутација“ во тоа.
Приказната потекнува од маргинални онлајн кругови години претходно, најзабележливо преку видео на YouTube од 2021 година, создадено од француските блогерки Амандин Роа и Наташа Реј.
Семејството Макрон првично доби тужба за клевета против нив во Франција во 2024 година, но пресудата беше поништена во 2025 година на втора инстанца поради слобода на изразување, а не поради веродостојноста на обвиненијата. Двојката ја обжали одлуката.
Во јули 2025 година, семејството Макрон поднесе нова тужба против Овенс во САД. Во тужбата се тврди дека таа „свесно ги игнорирала сите веродостојни докази што ги побиваат нејзините тврдења, за да им даде платформа на познати теоретичари на заговор и докажани клеветници.“
Во американските тужби за клевета, кога станува збор за јавни личности, тужителот мора да докаже т.н. „вистинска злонамерност“ — дека тужениот ширел лажни тврдења намерно или со целосно занемарување на вистината.
Превземено: Факти.бг