Силен земјотрес со јачина од 5,2 степени според Рихтеровата скала ја погоди Грција кратко пред 00:30 часот, предизвикувајќи вознемиреност во регионот на Евија и Атика.
Геодинамичкиот институт соопшти дека епицентарот бил лоциран во морето, на 5 километри западно-северозападно од Стира, на длабочина од 13,6 километри. По главниот потрес следуваа повеќе афтершокови, меѓу кои два со јачина од 2,5 и 2,6 степени во рок од 15 минути, како и уште четири помали потреси меѓу 1,6 и 2,0 степени.
Сеизмичката активност започна уште два часа порано со потрес од 2,6 степени, јавуваат грчките медиуми.
Сеизмологот Ефтимис Лекас предупреди дека во наредниот период можно е да има и нови потреси со јачина над 4,0 степени.
Иако засега нема пријавени жртви или сериозни материјални штети, многу жители од регионот од страв ја поминаа ноќта на отворено.