Една посетителка била шокирана кога во средата наутро на брегот на велшка плажа ги пронашла остатоците од таинствено суштество.
Трупот на огромно и мистериозно суштество исплива на популарна британска плажа, предизвикувајќи шок кај локалното население и туристите.
Сѐ уште не е точно утврдено за какво суштество станува збор, но некои веруваат дека се работи за остатоци од исклучително големо морско животно. Делот што наликува на градниот кош изгледал како да има делумно распаднато месо што виси од него.
Посетителката го забележала трупот на песокот на плажата Сефн Сидан во Пембри, мислејќи дека се работи за кит. Призорот привлекол големо внимание од локалните жители и посетителите на оваа популарна плажа. Се очекува морски експерти да го испитаат суштеството и да се обидат да го утврдат причинителот на смртта, како и точниот вид на животното.
Според The Sun, ваквите смртни случаи често се поврзуваат со неухранетост или загадување на водата, особено од пластичен отпад.
Иако е тажно откритие за научниците, испитувањето на суштеството им нуди можност да добијат вредни информации за здравјето на морскиот екосистем во тој регион.
Ова откритие следи по сличен случај од почетокот на годината, кога на плажата Ардир во Шкотска исплива уште едно огромно егзотично предаторско суштество. Шетач на кучиња го пронашол телото на суштество што личело на змија.
Стручњаците од британската Програма за истражување на насукани китови исклучиле можноста да се работи за морски вид. Се сметало дека е премногу големо за да биде домашна змија.
Крис Њуман од Националниот центар за добросостојба на влекачи изјавил: „Тешко е со сигурност да се каже за кој вид станува збор, но можно е да се работи за мрежест питон.“
Станува збор за најдолгиот вид змија во светот, познат по тоа што лови луѓе, иако нападите се ретки.
Шкотската SPCA, пак, сметала дека се работи за возрасен удав, потекло од Јужна Америка. Како завршил во Шкотска – останува мистерија.