Луксузната вила на поранешниот италијански премиер Силвио Берлускони се продава. Крајбрежната резиденција во Сардинија, позната по своите озлогласени забави „бунга бунга“, се проценува дека вреди 500 милиони евра.
Доколку вилата се продаде за 500 милиони евра, таа би била една од најскапите приватни домови во светот.
Вила Чертоса, луксузен имот на Сардинија на ексклузивниот брег на Коста Смералда на североистокот од островот, долго време се поврзува со забавите „бунга бунга“ на Берлускони, или наводните оргии со малолетни девојки, иако Силвио Берлускони отсекогаш тврдел дека тоа биле само елегантни вечери.
Во 2023 година, Берлускони, кој почина подоцна истата година, беше ослободен во третото и последно судење во скандалот бунга-бунга, кој се фокусираше на Мароканката Карима ал Мару, позната како Руби, на која Берлускони наводно ѝ платил за сексуални услуги додека била малолетна. Тој беше обвинет во околу 30 случаи од 1990-тите, но серија судења на повисоки судови резултираа со ослободителни пресуди, обично поради недостаток на докази или застареност, како и неговата возраст.
Резиденцијата на брегот од 4.500 квадратни метри,некогаш позната како Вила Монастеро, ја купи Берлускони во 1980 година и оттогаш стана негов највреден имот. Вилата, меѓу другите, ги смести рускиот претседател Владимир Путин, поранешниот американски претседател Џорџ В. Буш и поранешниот британски премиер Тони Блер.
Имотот се одликува со терасовидни градини исполнети со кактуси и вештачки мегалити, повеќе базени и бунгалови околу вештачки вулкан. Поекстравагантните додатоци вклучуваат тајна морска пештера достапна со брод, базен со тема на Посејдон, амфитеатар во римски стил и подземен нуклеарен бункер.
Во 2004 година, Берлускони ја означи резиденцијата како „алтернативна локација со највисоко можно ниво на безбедност за премиерот“ со владин декрет.