Предупреди и за најчестите грешки што многумина ги прават
Во секој дом, подовите се површини што најмногу „страдаат“: по нив се оди секојдневно, често се пролева нешто, се валка или се крши. Иако се трудиме да ги одржуваме чисти, сјајот како во луксузните хотели изгледа недостижен. Но, што ако ви кажеме дека блескави, миризливи и беспрекорно чисти подови можете да добиете со нешто што веќе го имате во кујната – и тоа за само 20 центи?
Мелиса Браунинг, професионална чистачка со 18 години искуство во луксузни лондонски хотели – вклучувајќи го и познатиот „The Ritz“ – ги откри своите најдобри совети за чистење подови без траги, дамки и лепливи остатоци. Притоа истакна една необична, но исклучително ефикасна тајна – лимон.
Помалку хемикалии, повеќе памет
Мелиса предупредува дека најчестата грешка во приватните домови е прекумерната употреба на хемикалии.
„Луѓето мислат дека ако нешто силно мириса, значи дека е чисто. Но, во хотелите со пет ѕвезди не се потпираме на агресивни производи – чистиме паметно“, вели Мелиса.
Наместо скапи средства, таа користи – половина лимон.
Лимонот е природно средство за чистење благодарение на високата содржина на лимонска киселина, која делува антибактериски и антисептички. Освен што е ефикасен на различни површини – од даски за сечење до кујнски плочи – совршено се вклопува и во рутината за чистење подови.
„Во кофата за миење под секогаш цедам сок од половина свеж лимон. Тоа го правам со години. Користам и мала количина класично средство за чистење, но лимонот е тој што ги разградува маснотиите, ги отстранува непријатните мириси и дава природна свежина што не може да се имитира“, открива таа.
Најчести грешки
Овој трик првпат го применила додека работела во хотели каде подовите биле од природни и вештачки материјали, а употребата на силни хемикалии била забранета.
„Менаџерите постојано ми велеа дека подовите изгледаат прекрасно. Но, всушност, заслугата беше на лимонот“, вели таа.
Иако чистотата е примарна, Мелиса нагласува дека мирисот на просторијата често остава прв впечаток.
„Може да имате совршено чисти подови, но ако сè мириса на хемикалии, целиот впечаток пропаѓа“, предупредува таа.
Освен претерување со хемикалии, таа издвојува уште една честа грешка – повторна употреба на валкана вода во различни простории.
„Валканата вода пренесува бактерии и нечистотија. Променете ја водата меѓу собите – потребни се две минути, а разликата е огромна“, вели таа.
Пет златни правила
Мелиса низ годините развила своја формула за чистење, која се покажала ефикасна и во луксузни хотели и во мали градски станови. Нејзините правила се едноставни:
– Користете помалку средство отколку што мислите: „Доволен е еден капач. Оставете водата да ја заврши работата.“
– Секогаш прво усисајте или пометете: „Неверојатно е колку луѓе бришат под преку прашина и трошки.“
– Микрофибра е задолжителна: „Нема траги, нема размачкување и подобро ја задржува нечистотијата од сунѓерестите мопови.“
– Додадете половина лимон: „Природно антибактериски, разградува маснотии и мириса фантастично.“
– Отворете прозорци: „Свежиот воздух помага подот побрзо да се исуши, а мирисот на лимон да остане подолго.“
Како правилно да се користи лимон?
Мелиса нагласува дека лимонот треба да се користи умерено и никогаш директно на подот. Прво треба да се исцеди во вода и да се промеша. Ако не сте сигурни како ќе реагира површината, пробајте на мал, скриен дел.
Препорачливо е да се избегнува лимон на природен камен (како мермер), незаштитено дрво или месинг. Исто така, никогаш не го мешајте со белило – комбинацијата на лимонска киселина и хлор може да создаде токсичен гас.
На повеќето површини како керамика, винил, линолеум, ламинирани и други заштитени подови, лимонот може безбедно да се користи, сè додека по чистењето подот се испере со чиста вода и се избрише до суво.
„Луѓето прво го чувствуваат мирисот, а потоа забележуваат колку е просторот чист. Затоа, ако сакате подови што сјаат и дом што мириса свежо – заборавете на агресивни хемикалии. Земете лимон“, заклучува таа.